2009年12月4日 (星期五)

剛剛去完旅行番來未夠一個星期，又到我生日啦，真係冇時停。

我生日依個星期，很多朋友/ 同事請我食生日飯，真的非常感謝。

生日當天，有番工，但個心一早就放左工...成日都唔知飛左去邊。終於等到放工了，去睇左 3D 聖誕魔法頌，完全唔好睇，等我仲滿心期待LAW。

睇完，拎埋生日CAKE，就約左班朋友去太子酒店食自助餐....生日當天有朋友同自己慶祝生日，是一件好幸福的事。

由於大家都食到很滿足，so 連cake 都切就各自回家了。當然東有送我番去啦!!(一年一次)

雖然冇咩驚喜，不過簡單平凡都是一種幸福。

28-11-2009

回程之前，仲有幾個地方要去。估唔到，今日先係我地大出血的地方......

早餐去左食人參雞果度食自助早餐，又係麻麻。

第一個景點 - 正官庄，依度介紹人參的好處，食法咁。我地個個都受唔住引誘，但因為一盒實在太貴了，不過我地又想買，所以個個夾d，每人分d d，咁就大家都可以番去做孝順仔，孝順女喇。

第二個景點 - 買補腎藥品，果度的人做左d實驗，簡直令人嘩然...完全唔敢再飲可樂或咖啡。係依度，我犀利啦，我可以保持清醒，不動搖。可惜，我身邊的那位實在抵不住d甜言密語了，自己一個人買了一盒。原來佢都覺得自己的生活不規律，都會為自己身體著想既，咁我都放心d。

韓國的最後一餐午餐，上樓的餃子火鍋。味道都可以，但我麻麻好餃子，不過我仍然食左兩碗飯，因為d湯好清甜，可以食湯飯。

最後一個景點 - 陳明的手信店。由於最後先來依度，我地帶既錢都用得七七八八，所以唔可能再好似係明洞咁大買特買了。只能簡簡單單買d手信番公司。雖然買既野唔多，但仍然要pick 箱，個個都pick，如果我地唔pick，咪比人覺得買左好少野，所以都跟下大圍，一齊排隊pick箱....頓時覺得自己好犀利，連兩個大"gift"都唔夠擺，仍然要pick 箱，好鬼死自豪。

去到機場，陳明教我地點退稅，初次嘗試，都算成功。今次我終於可以同東搭飛機坐埋一齊了，佢亦都冇玩，陪我訓覺...

番到香港，整下整下，已經十二點。先上番東家，分好d野，再上佢朋友家，會下久違的四方城，不過我輸曬，仲要一路打一路恰眼訓 (係韓國習慣了未到十一點上床訓)。比東鬧左一餐。

27-11-2009

距離番香港仲有2日。

今日行程冇咁辛苦...是SHOPPING日~

一早去左食自助早餐...係一餐冇咩野食的自助早餐。

再出發去第一個景點 - 化妝品 / 護膚品專買店。係入面試用左D產品，發現自己的皮膚其實唔係我想像中咁好架....因此同個朋友夾份買左幾種護膚品。點知，買完出來，比東搶住要。仲貪靚過我。

第二個景點 - 明洞，依度有唔同的化妝品店舖，當然我地都揀d比較熟識而入去搶購架啦。例如︰skin food，etude house等。行街係女孩子的天性，係果刻，我突然覺得東好阻住我，搞到我冇辦法盡情fing 錢....so, 幾位男孩子就行開，自己睇野。而我地幾位女孩子就正式進入瘋狂狀態，去完一間又一間，唔係因為有錢銀限制同對化妝、護膚的知識不夠，我可能已經搬左其中一間店舖的所有物品番香港了。其實買咩都唔重要，我只是追求買個刻的過程。認真痛快。

行完2個鐘，就去食全個旅程，最豐富的一餐午餐了。牛肉火鍋 + 自助餐。依個自助餐就唔同了，有好多種野食比我揀，而且牛肉鍋的湯好好飲，非常滿足，但因為大家都博曬命咁拎野食，所以大部分都食剩了。

第三個景點 - 梨太院，依度比明洞明顯小左好多野行，冇辦法買到自己既野，但東就係依度比佢搵到夢魘以求的灰色布褲，佢就開心啦，個個都買到野，得我冇。唯有買番3對可愛襪仔補數。

第四個景點 - 韓國政府(實際名稱唔記得左)...依度冇咩睇，影左幾幅相就行人lu...。

第五個景點 - 魚市場，依度的魚市場同香港的街市好唔同，香港街市買菜，買魚，買雜貨，買生果，林林種種，咩都有得買。但依度的魚市場，只有海鮮買。我地買左2隻蟹(蒸埋)，3條八爪魚(刺身)，6隻鮑魚(刺身)，急不及待番酒店開餐。

番到酒店，男孩子係房擺好架步，女孩子就落"超級市場"買野飲同杯面，大家分工合作。食左一餐過千銀的海鮮晚餐。

享受完畢後，就屎忽痕地，拎曬所有戰利品出來，攤曬係張床度影相，其實都唔係好多野姐，一半床都冇。雖然條氣唔多順，不過冇計啦，點都要開始執行李，準備明天離開韓國。唔捨得，想繼續行街。

26-11-2009

好野，今次唔係我地最遲了，haha...因為我地係最低層，唔使將行李搬上搬落，縮短左唔少時間丫....

嘩!一出房門，地下結霜丫，太陽射落去d霜到，閃閃生輝。咁大個女第一次睇到咁大面積的結霜環境，非常興奮。食早餐lu，今日食餃子做早餐，味道非常好，而且係咁凍的天氣，一早飲碗熱湯，成身感覺暖暖。食完，又去行下，影下相。小木屋的外面環境真的好靚，簡直同內在"差天共地"。

今日第一個景點 - 士多啤梨園，但點解個園冇士多啤梨既??究竟比人摘曬、定食曬丫?但一場來到，冇理由空手而回架...所以佢地教我地講大話，事先比定一盒大大粒的士多啤梨我地，然後叫我地逐個逐個拎左粒士多啤梨係園地扮野摘出來影相....不過效果都幾好。這是善意的慌言，我接受!!

第二個景點 - 制作韓式泡菜，一入去，就要扮成cooking ma ma 咁，男又係咁，女又係咁，都幾得意。而且泡菜都唔係咁難整姐。so easy....

第三個景點 - 體驗韓式風情，試著韓式服式。haha....果位韓國大嬸唔知係唔係見到我苦惱咁搵衫，所以想幫下我呢，但都唔使，係唔話我矮，仲比件較短既裙我著架...冇曬自尊。算，最後我都揀左件靚衫影相，仲扮埋男人tim....

今日午餐自費，又比人帶左去食燒烤餐。不過今次係豚肉，因為食左好多餐肉啦，食到有D滯滯地。冇咩胃口。

第四個景點 - Ever Land，機動遊戲唔岩我，所以冇玩過。只係玩左個激流(凍到飛起)，3D影院，野生動物園。有個70度既過山車，本身東心口掛住個勇字想上去玩既，後來縮沙....真的好斜，就算我冇玩，下面睇都腳陣LAW。依個樂園有刺激的機動遊戲，亦都有老少咸宜的小玩意，同有比情侶拍照的浪漫環境。果然冇來錯......

是日晚餐 - 人參雞...民名已名的一餐..由於晏就果餐食得唔多，所以可以一個人食曬一個煲，仲加左3個米粉TIM...肥死了。不過肥都睇，實在太好味了。

夠鐘番酒店了，依間酒店係咁多日來，最麻麻的一間，房屋細不但止，細仲要整埋廚房，仲要係有用具的廚房....我完全唔明白冇用的廚房點解仲要擺係度?而廁所就要整得咁細，連關門都有問題LAW。又是早訓覺的一晚。

25-11-2009 (星期三)

尋日太折騰了，休息番一晚，總算D魂魄番咁D來。導遊講今日要著曬d禦寒衣物上身，因為今日大部分活動都係戶外，非常寒冷。

於是我地都不敢胎慢，將手襪、頸巾、冷帽及耳罩放入環保袋拎出去，當然羽絨、雪褸已經著左起身啦。

以東的 e e 摩摩的性格，我地梗係包尾果組落去食早餐啦。食完，一班朋友就急不及待衝去酒店附近影相。 影呀影....又遲到喇.....

今日第一個景點 - 踩軌道單車(去旅行都咁辛苦自己!!!d人成日都驚奇咁問)，其實依個軌道單車沿山邊設計，一路踩，一路欣賞沿途風景。仲一點也不辛苦，因為2個人一部，不用曬好多力去踩。如果累的話，就休息一下，唔踩住，等後面果部來到推埋自己。hehe....頑皮既我地，當然冇欣賞風景啦，只係自己癲衰，亙相撞來撞到啦。

第二個景點 - 游船河。我對依個活動冇咩印象，只記得要行一段樓梯先到達。而且洗手間冇得洗手。導遊其實一路都有講解沿途d山同石，但因為我地又一早出左去玩，自己影相，所以完全冇聽佢講咩，印象不深丫。

到食午飯了，去食火鍋配飯。唔知係唔係今日比較凍呢，食左兩碗飯。而conon就一路係咁幫我地加菜、肉、紫菜同飯。

食完，去好洗手間，又到長車程了。一上車，第一時間就搵番自己個枕頭 (i.e. 東的肩膀)冬眠。訓左大約一個鐘到，比人叫醒，因為到了中途站，又係時間去洗手間了。去韓國之旅，做得最多的就係去洗手間，明明剛剛去完，隔多一陣，又有得去。中途站有d臭味，原來附近有一牛糞發電廠。我地去到一個攤檔，為我地今晚的餘慶節目做準備 - 一共買了3 pack 的煙花，打算今晚係小木屋放。

上車lu，過多陣，又落車了，去到一間所謂"超級市場"買食物 for 今晚的。買左d杯面，餃子，鴨胸同零食。買完，就要即刻食晚飯打定底先，去食燒烤餐，不過全部都係豬肉，而且仲要肥到不得了的豬肉，搞到成個鑊，都係油....認真麻麻....不過餐廳出面可以睇到出名的鳳凰城滑雪場。真的好想去玩。但奈何我地依團係冇包的。唉!!

八點多，終於番酒店(小木屋)了，小木屋外面睇好靚，好有外國feel。但內裡非常殘舊，我完全都唔敢打開露台隻門law，廁所又有蜘蛛，太恐怖了。

放好曬行李，就出去玩煙花了。嘩!!朝早都冇咁凍，玩煙花果陣，帶住手襪，仍然隻手都薑硬左law。今次可以憑玩煙花做到我幾年前想做的拍攝效果....好滿足，我同東畫左粒星星，同心心呀，so good~ 興奮完一番後，就上番去整野食了。玩左陣，又各自番房訓，迎接明天的來臨。